കെ.കെ. ശൈലജയും എം.വി. ജയരാജനും സി.പി.എം സംസ്ഥാന സെക്രട്ടേറിയറ്റിൽ; സംസ്ഥാന സമിതിയിൽ 17 പുതുമുഖങ്ങൾ
കൊല്ലം: കണ്ണുരിൽനിന്നുള്ള പ്രതിനിധികളുടെ അപ്രമാദിത്വവുമായി സി.പി.എം. സംസ്ഥാന സെക്രട്ടറിയേറ്റ്. മൂന്ന് പുതുമുഖങ്ങൾ ഉൾപ്പെടെ 17 അംഗ സെക്രട്ടറിയേറ്റിൽ കണ്ണുരിൽനിന്നുള്ള അഞ്ച് പ്രതിനിധികളുണ്ട്. സി.പി.എം. കണ്ണൂർ ജില്ലാ സെക്രട്ടറി എം.വി.ജയരാജൻ, എറണാകുളം ജില്ലാ സെക്രട്ടറി സി.എൻ. മോഹൻ, സി.പി.എം. കേന്ദ്ര കമ്മിറ്റിയംഗം കെ.കെ. ശൈലജ എന്നിവരാണ് സംസ്ഥാന സെക്രട്ടറിയേറ്റിലെ പുതുമുഖങ്ങൾ.
17 അംഗ സെക്രട്ടറിയേറ്റിൽ അഞ്ചുപേരാണ് കണ്ണൂർ ജില്ലയിൽ നിന്നുള്ളവർ. മുഖ്യമന്ത്രി പിണറായി വിജയൻ, സംസ്ഥാന സെക്രട്ടറി എം.വി.ഗോവിന്ദൻ, കേന്ദ്ര കമ്മിറ്റിയംഗങ്ങളായ ഇ.പി.ജയരാജൻ, കെ.കെ.ശൈലജ, കണ്ണൂർ ജില്ലാ സെക്രട്ടറി എം.വി.ജയരാജൻ എന്നിവയാണ് സെക്രയേറ്റ് അംഗങ്ങളായ കണ്ണൂരിൽ നിന്നുള്ള നേതാക്കൾ. മുൻ അംഗങ്ങളായ ആനാവൂർ നാഗപ്പൻ, എ.കെ.ബാലൻ, പി. കെ. ശ്രീമതി എന്നിവരുടെ ഒഴിവിലേക്കാണ് പുതിയ മൂന്ന് അംഗങ്ങൾ എത്തിയിരിക്കുന്നത്.
ജില്ലാ സെക്രട്ടറിമാരായിരുന്ന എം.വി.ജയരാജൻ, സി.എൻ.മോഹനൻ എന്നിവർ സംസ്ഥാന സെക്രട്ടറിയേറ്റ് അംഗങ്ങളായതോടെ കണ്ണൂർ, എറണാകുളം എന്നീ ജില്ലകളിൽ പുതിയ സെക്രട്ടറിമാർ വരും. സി.പി.എം. കോട്ടയം ജില്ലാ സെക്രട്ടറിയായിരുന്നു എ.വി. റസ്സൽ മരിച്ചതിനെ തുടർന്ന് ഈ ജില്ലയിലും സെക്രട്ടറി സ്ഥാനം ഒഴിഞ്ഞുകിടക്കുകയാണ്.
മുതിർന്ന നേതാവായിരുന്ന ആനാവൂർ നാഗപ്പൻ സംസ്ഥാന സെക്രട്ടറിയേറ്റിൽനിന്ന് ഒഴിവാക്കപ്പെട്ടതോടെ തിരുവനന്തപുരം ജില്ലയെ പ്രതിനിധീകരിക്കുന്ന നേതാക്കൾ സെക്രട്ടറിയേറ്റിൽ ഉണ്ടാവില്ലെന്നതും ശ്രദ്ധേയമാണ്. തൃശ്ശൂർ, വയനാട്, കാസർകോട് ജില്ലയിലെ നേതാക്കൾക്കും സെക്രട്ടറിയേറ്റിൽ പ്രാതിനിധ്യം ലഭിച്ചിട്ടില്ല.
കോഴിക്കോട് ജില്ലയിൽനിന്ന് മന്ത്രി മുഹമ്മദ് റിയാസ്, എൽ.ഡി.എഫ്. കൺവീനർ ടി.പി.രാമകൃഷ്‌ണൻ, ദേശാഭിമാനി എഡിറ്റർ ദിനേശൻ പുത്തലത്ത് എന്നീ നേതാക്കളാണ് സെക്രട്ടറിയേറ്റിലുള്ളത്. കൊല്ലം ജില്ലയെ പ്രതിനിധീകരിച്ച് മന്ത്രി കെ.എൻ. ബാലഗോപാൽ, പത്തനംതിട്ട ജില്ലയിൽനിന്ന് തോമസ് ഐസക്, ആലപ്പുഴയിൽനിന്ന് സജി ചെറിയാൻ, കോട്ടയത്തുനിന്ന് മന്ത്രി വി.എൻ.വാസവൻ, ഇടുക്കിയിൽനിന്ന് കെ.കെ.ജയചന്ദ്രൻ, എറണാകുളത്തുനിന്ന് മന്ത്രി പി.രാജീവ്, സി.എൻ.മോഹൻ, പാലക്കാടുനിന്ന് പി.കെ.ബിജു, മലപ്പുറത്തുനിന്ന് എം.സ്വരാജ് എന്നിവരാണ് സംസ്ഥാന സെക്രട്ടറിയേറ്റിലെത്തിയത്
Comments
Post a Comment