വീട്ടുജോലി കഴിഞ്ഞുമാത്രം സ്കൂളിൽ പോയാൽ മതിയെന്ന് ഭർതൃമാതാവ്, എലിവിഷം ഉള്ളിൽച്ചെന്ന് ചികിത്സയില്‍ ആയിരുന്ന 20 വയസ്സുകാരി മരണത്തിന് കീഴടങ്ങി...

 

ആലത്തൂർ: ഭർതൃഗൃഹത്തിൽ വെച്ച് എലിവിഷം ഉള്ളിൽച്ചെന്നതിനെ തുടർന്ന് കോഴിക്കോട് സ്വകാര്യ ആശുപ്രതിയിൽ ചികിത്സയിലായിരുന്ന യുവതി മരിച്ചു. ഇരട്ടക്കുളം നെല്ലിയാംകുന്നം ഇടത്തിൽകോളനി അബ്ദുൽ റഹ്‌മാന്റെ ഭാര്യ അസ്‌ന (20) ആണ് മരിച്ചത്. ഗവ.ഗേൾസ് സ്കൂ‌ളിലെ പ്ലസ്‌ടു വിദ്യാർഥിനിയാണ്..

കഴിഞ്ഞ വർഷം ഏപ്രിൽ 20ന് ആയിരുന്നു ഇവരുടെ വിവാഹം. വിഷം ഉള്ളിൽച്ചെന്ന് അവശനിലയിലായ അസ്നയെ ആലത്തൂർ, എറണാകുളം എന്നിവിടങ്ങളിലെ സ്വകാര്യ ആശുപ്രതികളിൽ പ്രവേശിപ്പിച്ചെങ്കിലും നില വഷളായതിനെ തുടർന്നു കോഴിക്കോട് സ്വകാര്യ ആശുപത്രിയില്‍ എത്തിക്കുകയായിരുന്നു, ചൊവ്വാ രാവിലെയാണ് മരിച്ചത്..

ഭർത്താവിന്റെ ഉമ്മ വീട്ടുജോലികൾ മുഴുവൻ ചെയ്യിപ്പിച്ച ശേഷം മാത്രമേ സ്കൂളിൽ പോകാൻ അനുവദിച്ചിരുന്നുള്ളു എന്നും ഇത് അസ്നയ്ക്കു മാനസികവിഷമങ്ങൾ ഉണ്ടാക്കിയിരുന്നുവെന്നും അസ്ന‌യുടെ ബന്ധുക്കൾ മൊഴി നൽകിയിട്ടുണ്ടെന്നു പൊലീസ് പറഞ്ഞു.. അസ്വാഭാവിക മരണത്തിനാണ് കേസ്. ബന്ധുക്കളുടെ പരാതി അന്വേഷിച്ചു തുടർനടപടി സ്വീകരിക്കുമെന്നു പൊലീസ് പറഞ്ഞു. കാവശ്ശേരി ചുണ്ടക്കാട് പെരിങ്ങോട്ടുകുന്ന് വീട്ടിൽ ഹനീഫയുടെ മകളാണ് അസ്ന...