ഓപ്പറേഷൻ തൂഫാൻ :പയ്യന്നൂരില് ജ്യോതിഷാലയത്തില് നിന്ന് കഞ്ചാവ് പിടികൂടി; ജ്യോത്സ്യനെതിരെ കേസെടുത്തു.
പയ്യന്നൂര്: പയ്യന്നൂർ നഗരത്തിലെപഴയ ബസ് സ്റ്റാന്ഡിന് സമീപം പ്രവര്ത്തിക്കുന്ന ജ്യോതിഷാലയത്തില് നിന്ന് മയക്കുമരുന്ന് ഇനത്തില്പ്പെട്ട കഞ്ചാവ് പോലീസ് പിടികൂടി.
സംഭവവുമായി ബന്ധപ്പെട്ട് ജ്യോതിഷാലയം നടത്തിപ്പുകാരനായ കാങ്കോല് വടശേരി പെരികമന ഇല്ലം പി.ശ്രീനാഥ്(40) എന്നയാള്ക്കെതിരെ പയ്യന്നൂര് പോലീസ് കേസെടുത്തു.ബുധനാഴ്ച വൈകുന്നേരം പയ്യന്നൂര് സബ് ഇന്സ്പെക്ടര് പി.വി.അനുശ്രീയുടെ നേതൃത്വത്തിലുള്ള പോലീസ് സംഘവും ഡാന്സാഫ് (DANSAF) ടീമും ചേര്ന്നാണ് പരിശോധന നടത്തിയത്.
ജ്യോതിഷാലയത്തില് കഞ്ചാവ് സൂക്ഷിച്ചിട്ടുണ്ടെന്ന രഹസ്യ വിവരത്തിന്റെ അടിസ്ഥാനത്തിലായിരുന്നു റെയ്ഡ്.
കെട്ടിടത്തിന്റെ താഴത്തെ നിലയിലുള്ള മുറിയിലെ ചുമര്അലമാരയില് പ്ലാസ്റ്റിക് കവറിലാക്കി സൂക്ഷിച്ച നിലയിലാണ് 5.77 ഗ്രാം കഞ്ചാവ് കണ്ടെടുത്തത്.
തുടര്ന്ന് ശാസ്ത്രീയ പരിശോധനയിലൂടെ ഇത് കഞ്ചാവാണെന്ന് ബോധ്യപ്പെട്ടതോടെ പോലീസ് സംഘം മഹസ്സര് തയ്യാറാക്കി ഇവ കസ്റ്റഡിയിലെടുക്കുകയായിരുന്നു.
പ്രതിക്കെതിരെ എൻ ഡി പി എസ് നിയമത്തിലെ വകുപ്പ് 20(b)(ii)(A) പ്രകാരം കേസ് രജിസ്റ്റര് ചെയ്ത് പയ്യന്നൂര് പോലീസ് തുടര്നടപടികള് സ്വീകരിച്ചു വരുന്നു.
പരിശോധനാ സംഘത്തില് എസ്.സി.പി.ഒ അബ്ദുല് ജബ്ബാര്, ഡാന്സാഫ് ടീം അംഗങ്ങളായ ബിനീഷ്, ശ്രീജിത്ത്, സജിത്ത്, നിശാന്ത്, ഗിരീഷ് എന്നിവരും ഉണ്ടായിരുന്നു. എന്നാൽ ഗുഡ പൂജകൾക്കു വേണ്ടി തന്ത്ര വിധിപ്രകാരം സുക്ഷിച്ച കഞ്ചാവാണ് പിടികൂടിയതെന്നാണ് ജ്യോത്സൻപൊലിസിന് നൽകിയ മൊഴിയെന്നാണ് വിവരം.
Comments
Post a Comment